काही रडून गेले काही हसून गेले

गझल

काही रडून गेले काही हसून गेले
जळताच प्रेत माझे सारे निघून गेले

शेरामध्ये जरासे मी दु:ख मिसळले अन्
'क्या बात..'ओठ त्यांचे हसुनी म्हणून गेले

नाही दुखावले मी कोणासही कधीही
त्यांचेच शब्द सारे वांदे करून गेले

कोणास देत नाही मी दोष कोणताही
आयुष्य एकट्याने अर्धे सरून गेले

होताच छंद माझा नात्यात राहण्याचा
मी संकटात होतो सारे दुरून गेले

– यल्लप्पा कोकणे
३० मार्च २०१८