जीवनाशी मी कुठे तडजोड केली
चित्रगुप्तानेच खाडाखोड केली
बोललो हासून मी तेव्हा तुझ्याशी
मी कडू माझी कहाणी गोड केली
कोणत्याही संकटाचा दोष नाही
मीच बंद्या सोसण्याची मोड केली
लाभलेली जिंदगी माझी न होती
चार श्वासांचीच मीही तोड केली
व्हायचे ते शेवटी होऊन गेले
मी कशाला व्यर्थ डोकेफोड केली
याचसाठी भेटली नाहीस तूही
मी दिशांशी सारखी धरसोड केली
- प्रदीप निफाडकर
(स्वप्नमेणा)
No comments:
Post a Comment