डोळ्यांची भाषा

डोळ्यांची भाषा ज्याला वाचता येते ती व्यक्ती नातं जपण्याच्या परीक्षेत पास होते.

यल्लप्पा सटवाजी कोकणे 

२७ फेब्रुवारी २०२०

आपली वेळ

स्वतःला वेळ दिला किंवा स्वतःसाठी वेळ राखून ठेवला कि, इतरांना भेटायला, संवाद साधायला वेळ मिळतो. आपली वेळ सर्वांना देणंही शक्य होतं. 

जेव्हा लढाईचा खरा डंका

जेव्हा लढाईचा खरा डंका झडाया लागला

आपापल्या तंबूमध्ये जो तो दडाया लागला

माझा अखेरीचा अता घेऊ कसा हा घोट मी

हातातला पेला पुन्हा खाली पडाया लागला

ह्या पांगळ्या पायांसवे मी चाललो होतो जरी

बेमान आयुष्या अता रस्ता अडाया लागला

गेला वधस्तंभाकडे कैदी सुखाने शेवटी

ज्याने दिली होती सजा तो आवडाया लागला

त्याला न आले बोलता आजन्म ज्याने सोसले

ज्याला हवे ते लाभले तो ओरडाया लागला

वाया न गेले शेवटी जे रक्त माझे सांडले

माझा जुना मारेकरी आता रडाया लागला

सुरेश भट

कवी

कवी

दुनिया झोपली गाढ सारी

कवी रात्री कशाला जागतो?

अंधार खोलीत एकटा बसून

जगाच्या तो भावना मांडतो

माणसांची गर्दी आहे तरी

कवी जातो शब्दात हरवून 

एकटा लिहीत असला तरी

शब्दात घेतो जग सामावून 

अक्षरांचा प्रवास हा नेहमी

थांबतो कोऱ्या कागदावर

मनात दाटलेलं मांडताना

राज्य करतो कवी शब्दांवर 

यल्लप्पा सटवाजी कोकणे 

१९ जानेवारी २०२०

माणूसकी

पैशाच्या मागे धावत असताना नात्याच्या वळणावर थोडं थांबून आपल्या माणसांत रमून जो माणूसकी कमवतो तोच खरा श्रीमंत माणूस असतो.


यल्लप्पा सटवाजी कोकणे
२५ डिसेंबर २०१९

राजकारण

नातं, कुटूंब किंवा असो मित्र

नाही भरवसा राजकारणात

दबाव कधी तर कधी दगा

काहीही होतं येथे क्षणात

यल्लप्पा सटवाजी कोकणे 

२३ नोव्हेंबर २०१९

लग्न

दोन मनांना व दोन कुटुंबाला एकत्र आणण्याचा सोहळा म्हणजे लग्न. एका नवीन नात्याच्या वळणावर मनात जबाबदारीची खूणगाठ बांधून विश्वासाचा हात पकडून नवीन जीवनात प्रवेश करणं म्हणजे लग्न.

आईच्या मायेने, बाबांचा आदर्श घेऊन वाढलेली लेक व खंबीर साथ असलेल्या भावाची दीदी सासरी जात आहे.

ओल्या झाल्या कडा बापाच्या

करत असता लेकीची पाठवण

गंगा यमुनाही आईच्या नयनी

मनातही आठवणींची साठवण

निघाली आहे नवरी सासरी

संभाळण्यास भार संसाराचा

नकोस करू काळजी पोरी

भाऊ आहे खंबीर आधाराचा

लेक चालली पहा सासरला

सुरू करण्यास संसार नवा

नवीन आयुष्याच्या प्रारंभास

थोर मंडळींचा आशिर्वाद हवा

यल्लप्पा सटवाजी कोकणे 

२३ नोव्हेंबर २०१९