छोटी रात्र

ध्येयास साथ माझी स्वप्नात रंगतो मी

वाटे भिती कशाची छोटीच रात्र आहे

यल्लप्पा सटवाजी कोकणे

०२ मे २०२१

काही रडून गेले काही हसून गेले

गझल

काही रडून गेले काही हसून गेले
जळताच प्रेत माझे सारे निघून गेले

शेरामध्ये जरासे मी दु:ख मिसळले अन्
'क्या बात..'ओठ त्यांचे हसुनी म्हणून गेले

नाही दुखावले मी कोणासही कधीही
त्यांचेच शब्द सारे वांदे करून गेले

कोणास देत नाही मी दोष कोणताही
आयुष्य एकट्याने अर्धे सरून गेले

होताच छंद माझा नात्यात राहण्याचा
मी संकटात होतो सारे दुरून गेले

– यल्लप्पा कोकणे
३० मार्च २०१८

गझल

एक शेर

विश्वास फार होता ज्याच्यावरीच माझा
त्यानेच "हाय" केला पाठीत वार माझ्या

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

हातून पालकांच्या संस्कार फार झाले?

पोरास जन्मदाते का आज भार झाले? 

कोणास काय बोलू माझाच दोष आहे

मरणे सुद्धा पहा ना घाईत फार झाले

सोडून एकटे मज दुःखात जे पळाले

माझ्या सुखात आता, ते भागिदार झाले

देतो कशास थारा गर्वास रोज आता

नाती तुटून गेली अन् बंद दार झाले

विश्वास खूप होता नात्यावरी म्हणोनी 

बहुदा असे हजारो पाठीत वार झाले

का? बाळगून आहे देहात राग तू रे

बघ शेवटी स्मशानी अंगार गार झाले

खर्चून जन्म माझा मी झेलले टिकांना

येताच वेळ माझी सारे फरार झाले

यल्लप्पा सटवाजी कोकणे

३० जानेवारी २०१८

गझल

कोणास का कळेना आयुष्य राज आहे

दुःखातल्या छटांचा भारीच साज आहे

नाती कशी जपावी याचा विचार आहे 

शब्दात गोडवा हा याचा इलाज आहे

ती भेटण्यास आली तोडून बंध सारे

अंगी तिच्या शहारे डोळ्यात लाज आहे

मी वाचतो मराठी मी ऐकतो मराठी 

संचारली मराठी याचाच माज आहे

मी राहतो मुक्याने कोठेच बात नाही

आवाज हुंदक्याचा का शांत आज आहे 

गझल

आनंदकंद

मद्यालयात जेव्हा पेला भरून घेतो
विसरून विश्व सारे थोडे जगून घेतो

धावून येत होते सारे सुखात माझ्या
दुःखात एकटा मी डोळे पुसून घेतो

सोसून घेत आहे तारूण्य हाय! माझे
तो भुतकाळ माझा थोड़े फिरून घेतो

मी घेतला पवित्रा आनंद पाहण्याचा
लपवून दुःख माझे खोटे हसून घेतो

झाली भरून झोळी साऱ्याच मालकांची
सोसून रक्त सारे  तो राबवून घेतो

यल्लप्पा सटवाजी कोकणे
१५ ऑक्टोबर २०१७

गझल

आनंदकंद

नेत्यावरी भरोसा ठेवून आज आहे
त्यांच्यात का कळेना आजन्म माज आहे

गेलो झिजून पुरता, पर्वा कधी न केली
गोतावळा तरीही नाराज आज आहे

नाती कशी जपावी मोठाच प्रश्न आहे
शब्दात गोडवा हा याचा इलाज आहे

हासून पाहते ती घायाळ जीव होतो
भेटीत का सखीच्या डोळ्यात लाज आहे?

राखेत लीन झाला आत्मा जळून गेला

तू एकटा स्मशानी हा अंत आज आहे

यल्लप्पा सटवाजी कोकणे

०१ नोव्हेंबर २०२४

गझल

एक शेर

शहरामधून पैसे गावात येत गेले
जागा पडीक होती आता महाग झाली

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

नेता खुशाल गेला फसवून देश माझा
आता कशास झाला हैराण देश माझा?

झाले महाग सारे जगणेच भारताचे
घेतो कसे तरीही सोसून देश माझा?

सृष्टीत देश सारा आहे नटून ऊभा
सार्‍या जगात आहे शोभून देश माझा

स्वातंत्र्य मागण्याला सामील लाख झाले
रक्तात न्हात होता हासून देश माझा

तेथे जवान होता झेलीत ऊन वारा
सीमा अजून आहे राखून देश माझा

यल्लप्पा सटवाजी कोकणे
१२ ऑगस्ट २०१७ 

गझल

काळोख सत्य सारे सांगून पहाट गेली
त्या चांदण्यात आता न्हाऊन पहाट गेली

आहे अबोल का तू भीती मनास वाटे
शृंगार आज सारा सांगून पहाट गेली

नाही समोर आता ती दूर फार गेली
अस्तित्व आज सारे भासून पहाट गेली

सांडून रक्त त्यांचे तो देश लाल झाला
स्वातंत्र्य एकदाचे देऊन पहाट गेली

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

शेतात राबणारे जीवा उदार होते
ते मेघ वाहणारे ईमानदार होते

सर्वस्व अर्पिले मी सारे तिलाच माझे
का आजही सखीच्या ओठी नकार होते?

मी चोरपावलांनी भेटावयास आलो
तैनात चांदणेही रात्रीस फार होते

चिंता कधीच नाही केली कशाची मी
देण्यास हात हाती ते जाणकार होते

देहात प्राण होता कोणी नसे समोरी
निष्प्राण देह जेव्हा खांदे तयार होते

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

माझ्याच माणसाचा खेळून डाव झाला 

त्यांच्या सुखात माझा मारून जीव झाला

लाथाडलेच त्याला कोणास काय त्याचे

पाषाण तोच होता तो आज देव झाला

गोतावळा कधीही देतोच फार धोका

एकांत राहण्याचा माझा सराव झाला

मी एकटाच होतो झेलीत वेदना त्या

दावी स्मशान आता गोळाच गाव झाला

डोळ्यांतही सखीच्या ती धार फार होती 

ते वार रोखताना झेलून घाव झाला

यल्लप्पा सटवाजी कोकणे 

२९ मे २०१७

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा

२ २ १ २ १ २ २... २ २ १ २ १ २ २ = २४ मात्रा

गझल

माणूस जीव माझा जाळीत फार होता
त्याच्या पुढे चितेचा अंगार गार होता

आलो जगात तेव्हा भारीच त्रास झाला
गर्भात माउलीच्या आराम फार होता

ही वाट पावसाची पाहून फार झाली

म्हणतात तो ढगाला भलताच भार होता

मी टाळलेच होते भेटायला सखीला

चंद्रा तुझा पहारा रात्रीस फार होता

ते शब्द भावनेचे सांगून खूप गेले

तो अर्थ सांगणारा माझाच शेर होता

यल्लप्पा सटवाजी कोकणे 

२५ जून २०१७

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

गझल

येथे महत्व मोठे जन्मास फार आहे 

दुःखास मीच आता केलेच ठार आहे

पेरून कर्ज झाले धान्यास भाव नाही 

पर्याय शेवटाचा फाशी तयार आहे

मी हाक मारली पण आले कुणी न तेव्हा
मसनात न्यायला ही गर्दीच फार आहे 

संभाळुनी जगावे वाटे मलाच आता

माझ्याच माणसांच्या शब्दात वार आहे

झालेच बंद आहे दारे पहा मनाची

का आज हे घराला मोठेच दार आहे?

यल्लप्पा सटवाजी कोकणे
२४ मे २०१७

गझल

वृत्त  - भुजंगप्रयात

ल गा गा ल गा गा.... ल गा गा ल गा गा

१ २ २ १ २ २.... १ २ २ १ २ २ = २० मात्रा

कळे आज नाते पहाटे कशाला?

तुही धुंद होते पहाटे कशाला?

निशा आज आली तुला भेटण्याला

मिठी सैल होते पहाटे कशाला?

तुझा हात हाती कसा आज आला?

भिती आज वाटे पहाटे कशाला?

प्रिये सांग आता उगा लाजते का?

बहाणेच खोटे पहाटे कशाला?

कुठे झोप गेली कळेना मलाही

मला जाग येते पहाटे कशाला?

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

ते सत्य मांडताना होऊन त्रास गेला
तो शब्द आज माझा होऊन दास गेला

मी मुक्त आज झालो देहात प्राण नाही
माझ्याच मानसांचा वाढून ध्यास गेला

होतीच आठवांची यादी तयार माझी
तेव्हा तुझाच राणी होऊन भास गेला

त्या चांदण्यात होती ती एकटीच ऊभी
तो चंद्र स्वागताला धावून खास गेला

बोलून गोड लोकां जिंकून घेतले मी
आत्ताच शेवटाचा जिंकून श्वास गेला


यल्लप्पा सटवाजी कोकणे
१७ मे २०१७

गझल

कोणास काय बोलू मी शांत आज आहे
घे ओळखून आता रक्तात लाट आहे



यल्लप्पा सटवाजी कोकणे
२८ एप्रिल २०१७

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

केव्हाच काढलं मी काळीज आज हाती
हासून तू जराशी केलास वार तेव्हा

यल्लप्पा सटवाजी कोकणे
२६ एप्रिल २०१७

गझल

वृत्त  - आनंदकंद

गा गा ल गा ल गा गा .... गा गा ल गा ल गा गा
२ २ १ २ १ २ २... २ २ १ २ १ २ २ = २४ मात्रा

माझेच एकट्याने अश्रू पुसून झाले
प्रवास जीवनाचा भारीच लांब होता

यल्लप्पा सटवाजी कोकणे
२५ एप्रिल २०१७

गझल

वृत्त  - आनंदकंद

 गा ल गा ल गा गा .... गा गा ल गा ल गा गा

२ २ १ २ १ २ २... २ २ १ २ १ २ २ = २४ मात्रा

तो एकटाच होता अश्रूच मित्र माझा

अंतीम दर्शनाला भारीच रांग होती

यल्लप्पा सटवाजी कोकणे

२४ एप्रिल २०१७