पुस्तक वाचन

नियमित पुस्तक वाचणारे व्यक्ती आपल्या चर्चेत किंवा गप्पांमधून वेगवेगळ्या विषय मांडून इतरांचे लक्ष केंद्रित करत असतात.

 यल्लप्पा सटवाजी कोकणे 

२४ ऑक्टोबर २०२१

हरवून गेली रात्र

हरवून गेली रात्र 

काळजात सखे नेहमी

फक्त तुझाच वावर आहे

आठवणीत झुरतो सदा

का रात्रीस जागर आहे?

हरवून गेली रात्र कुठे

सापडेना सूर मनाचा

संभाळून ठेवतो साठा

सार्‍या भेटीच्या क्षणाचा

जादू आहे कशाची ही

बेभान जगणे हे झाले 

स्मरण तुझे झाल्यावर 

गहिवरून मन हे आले

यल्लप्पा सटवाजी कोकणे 

०८ ऑक्टोबर २०२१

पाऊस स्मरणातला

पाऊस स्मरणातला

आनंद देणारा पाऊस

काळ होऊन बरसला

सुखी असणारा व्यक्ती

जगण्यासाठी तरसला

संसार उध्वस्त झाले

माणसं सारी दुरावली

काळीज चिरून गेली

भयानकता पूरातली 

बरसताना असतो नेहमी

प्रत्येक श्वास रोखलेला

कसाही असला पाऊस

स्मरणात नेहमी कोरलेला

यल्लप्पा सटवाजी कोकणे 

१५ ऑगस्ट २०२१

देवा विठ्ठला

देवा विठ्ठला 

तुझ्या दर्शनास मुकलो, अडकलो मी बंधनात

घरी राहून तुला विठ्ठला, कोंडतो मी काळजात

माय बाप माझा तू रे, कर संभाळ विठ्ठला

संकटाचा आता का रे, सांग वणवा पेटला

नाही गजर तुझा आता, ना टाळ मृदुंग देवळात 

घरी राहून तुला विठ्ठला, कोंडतो मी काळजात

सांग काय चूक झाली, वेळ फार सरून गेली

देवा विठ्ठला धाव आता, पंढरीची वाट दूर झाली

होऊ दे भेट तुझी माझी, जोवर हाय प्राण देहात

घरी राहून तुला विठ्ठला, कोंडतो मी काळजात

स्वामी जगाचा तू देवा, सांभाळून घे तू देवा

आशा तुझ्या दर्शनाची, ये धाव पाव तू देवा 

तुझे नाम ओठी ठेवून, गुंतलो देवा मी लेकरात

घरी राहून तुला विठ्ठला, कोंडतो मी काळजात

यल्लप्पा सटवाजी कोकणे

२२ जुलै २०२१

भान

भान

प्रेम करायला कधीही

काळ वय लागत नाही

लोकं काय म्हणतील?

याचं भान राहत नाही

सुरुवात होते नजरेने

घडायचं ते घडून जातं

काही शब्द न बोलता

मन का जडून जातं?

श्वासांचा पाठलाग होतो

जवळ दोघे असल्यावर

मनातलं मनातच राहतं

नजरेस नजर भिडल्यावर

यल्लप्पा सटवाजी कोकणे

३० मे २०२१

वृत्तपत्र

कितीही विचार केला तरी

व्हायचं तेच होणार आहे 

आज ज्ञान दिलेले वृत्तपत्र

उद्या रद्दीतच जाणार आहे

यल्लप्पा सटवाजी कोकणे

२८ मे २०२१

छंद

आपल्या भरकटलेल्या, चंचल मनाला शांत करणारं जालीम उपाय म्हणजे आपला छंद आहे.

यल्लप्पा सटवाजी कोकणे

२३ मे २०२१