जेव्हा एखादा साहित्यिक कोणत्याही शब्दात चूका न करता खुप विचार करून योग्य शब्दांचा वापर योग्य ठीकाणी करून, तनमन लावून आपले लेखन, काव्य पुर्ण करतो तेव्हा ते लेखन, काव्य रसिक डोक्यावर उचलून घेतात. तसेच नात्याचं असतं. आपण योग्य नात्याची निवड केल्यावर आपले जगणे सुखाचे होते.
– यल्लप्पा कोकणे
२५ मार्च २०१८
जो नको तो प्रकार मी केला
या जगाचा विचार मी केला
वेदना दे अजून थोडीशी
शब्द माझा तयार मी केला
मी स्मितानेच मारले अश्रू
हुंदका हद्दपार मी केला
पाहिले एकदाच स्वप्न तुझे
एक सौदा उधार मी केला
जीवनाशी अता पटे माझे
सोसण्याचा करार मी केला
- प्रदीप निफाडकर
कविता कधीकधी वहीत
गप्प पडून शांत रहाते
कधी शब्दांचे चटके देत
आग होऊन भडकत रहाते
थोडक्यात विचार मांडून
खुप काही बोलून जाते
कधी प्रश्नावर प्रश्न मांडत
मनात गोंधळ घालून जाते
कविता म्हणजे रूजलेले
विचार मनातून फुलतात
उतरताच जेव्हा कागदावर
ओठी रसिकांच्या झुलतात
कविता जन्मास येते
पाठलाग करून भावनांचा
आणि ती खुलत जाते
स्फोट होऊन शब्दांचा
– यल्लप्पा कोकणे
१४ मार्च २०१८
ये जरा आणखी जवळ माझ्या फुला
ओठ देतील हे गझल माझी तुला
भेट होता तुझी कैफ चढतो मला
रोज वार्यावरी बांधतो मी झुला
आपल्यासारखे ना जगी जोडपे
तू जणू बाहुली ! मी जणू बाहुला !
वेगळा हा दिसे, अन् लकाकत उठे
प्रेमरंगामध्ये रंग हा आपुला
मी तुझा ! मी तुझा ! मी तुझा ! मी तुझा !
रोज जपतो असा मंत्र हा सानुला
कैकदा वाटले छान लिहिशील तू
कृष्ण झालास रे शारदेच्या मुला
— प्रदीप निफाडकर
पाऊस पडतो रिमझिम, सखे भिजलं तुझं अंग।।
खट्याळ वारा तुझ्यासंगे, खेळे आज होऊनी दंग।।धृ।।
साद घालतो वारा, शीळ घालून गातो
आहे लबाड वारा स्पर्शून तुजला जातो
छान पसरली नक्षी आकाशी, इंद्रधनु फेकतो रंग।।
खट्याळ वारा तुझ्यासंगे, खेळे आज होऊनी दंग।।१।।
केस ओले गालावरी, पसरली ओठावर लाली
तारूण्य करी घायाळ, ही काय जादू झाली
वेड्या जीवास राणी किती वेड लावशील सांग ।।
खट्याळ वारा तुझ्यासंगे, खेळे आज होऊनी दंग।।२।।
पाऊस पडतो ओलाचिंब, सखे भिजलं तुझं अंग।।
खट्याळ वारा तुझ्यासंगे, खेळे आज होऊनी दंग।।धृ।।
– यल्लप्पा कोकणे
०१ मार्च २०१८
दिसती धुळवडीत एकसारखे
विसरूनी वाद होतील धुंद
आहेत हो ही माणसेच सारी
रंग दाखवण्याचा राखतील छंद
– यल्लप्पा कोकणे
०१ मार्च २०१८
